محلا ساعات الفرح
لما نكون صُحبة
محلا خطاوي الشعوب
لما تكون قدام
و أنا بين ضلام وحدتي
و مرارة الغربة
ضميتني في حضنها
ربوع بلاد الشام
و تابعت أنا و الفتى
_إسم الكريم "نشأت"_
زوال حكومة الغجر،
و تراجع الأزلام
من كتر فرحه لنا
شكيت يكون مصري
كان نفسي أقوم أحضنه
و أقول له أي كلام
و كلامي في جملته
ما يقولش أي كلام
فرحان أكيد بالبطل
شعبي اللي هب و قام
لكني يابن الحريري
خايف من الأيام
لتكون على عهدها
من سيئة لأسوأ
و الطفل شرب اللبن،
و لابد تاني ينام
"غليظ " أنا و مكتئب؟؟؟
يمكن كلامكو صحيح
لكني يا عزوتي
و انا بسمع التصريح
بأننا ف عهدنا
مع الصهاينة دوام
حسيت بأن البلد
لسه ماهيش بلدي
يمكن راعيها اختلف
يمكن فؤادها ائتلف
لكنها للأسف
في حلفها الأبدي
مع كلاب صهيون
على حساب بلدي
بلدي الكبير أُمِّتي
قلبي أنا و كَبَدي
بلد الصمود "غزتي"
مغروس هناك وَتَدي
ملعونة حريتي
لو هشتريها بدم
دم الشهيد في الخليل
و أخويا و ابن العم
ملعون أبوها الحدود
معبر رفح مسدود
يفارقني ليه الهم؟؟؟!!
يفارقني ليه الهم؟؟؟!!
No comments:
Post a Comment